بدون (آيسكريم)....

·     مروة عشان تبقيني أنا في ورطة مع حبوبتا وتطلع هي منها ...قالت انتي يا(هنويه) عشان علاقتك بالحبوبات كويسة والبيناتكم عامرة ... كلمة كلمتين تتفاهمي معاها ونبقي مارقين ....

·     قلت ليها يا زولة هوي ... الحبوبة حبوبتك ... والشخبطة شخبطك ... ولسانك ياهو قاعد ... وقاموس كلامك اكبر منك ... أنا ما عندي أي علاقة بالموضوع دا لا من بعيد لا من ابعد منو... براك تتصرفي مع حبوبتك ....

·     قعدت تقول لي أنا ما صحبتك ؟؟ وصحبتك وما صحبتك ... ولا قالت لي بعزمك ايسكريم  ... وعشان خاطر الصحوبية (ما الايسكريم) ....ورغم انو المحرش ما بقاتل زى الناس ....قلت ليها خلاص نمشي نتفاهم معاها الاتنين ... وهو ذاتو كان ماساي حبوبتك دي عشان مشلخة مفروض نهائي ما تتكلم في المكياج دا ....المهم انتي (اجتهدي) وجيبي لي سيرة الشلوخ بأي طريقة وخلي الباقي عليّ ....

·     وهسه شربنا الشاي

·     حبوبتا من شافتنا خلت ليك (بت ولدا)  وقبلت عليّ أنا الغلبانة دي ....قالت لي هوي يا هناء تتبسمي  وترمشي في عويناتك بعرفك دايرة تاخديني كلام عربي علي افرنجي وتمرقن .... بطلن اموركن دي ....

·     بصراحة اكتشفتنا بدري بدري ... قلت ليها ... والله ولا أمور ولا حاجة ... أمور شنو في المرحلة دي ؟! ....ونحن ذاتنا لا حاضرين افرنجي لا شلوخ .. قلت لي مروة سبحان الله كلمة افرنجي دي طوالي بتذكرني الشلوخ ... ساي كدا ...

·     قالت لينا ... اريتكن كان حضرتنو يا يمة زمن الشلوخ...

·     أنا طبعاً الأمنية دي بالذات ما بتبقي لي .. قلت ليها إذا لابد من التمني .. اريتو لو حضرتو (مروة) دي . أنا لا لا

....لكن بمناسبة الشلوخ دي ... انتن الكان جابركن عليها شنو ؟ ... قالت لي جابرنا ؟! ... هي الشلوخ بجبرونا عليها ..... الشلوخ زينة فوق زينة والشلوخ شنو وشنو ... بعد كملت كلاما عن الشلوخ ... قلت ليها أسباب الشلوخ التانية القلتيها دي خلينا منها .. لكن هسة انتي براك قلتي الشلوخ زينة .... يعني قومة وقعدة وآلات حادة وجروح وألم وحاجات وحاجات.... دا كلو في درب السماحة ....؟

·     قالت لينا .... الزول بتألم كلها ساعات وخلص الموضوع ...

·     قعدتا جنبها ... سألتها ... انتي لما قال ليك حا يشلخوك حسيتي بشنو ؟ وعملتي شنو ؟؟ مروة قالت لي تلقيها مشت تبكي لي حبوبتا ... وقالت ليها قولي لي ناس أمي ما يشلخوني ...

·     قالت لينا أنا أمي وأبوي ما دايرني اتشلخ نهائي ... ولما شفت البنات القدري شلخوهن (انسرقتا) من بيتنا ومشيت للمرة البتشلخ ... وجيت البيت مشلخة الشليخة الياها ..

·     قلت ليها اها هسه أخير و(ارحم) الشلوخ أم الجروح البتقعد العمر كلو واللا الألوان البتروح في ساعتا دي ؟....

·     بس وقامت ليك علينا .... عارفاكن أنا ...عارفاكن دايرات تصلن لي شنو ... قومن مني .... قومن ... أنا عاينت لي مروة ... قلت ليها (يا مروة حبوبتك دي قالت ليك قومي اعملي ليها عصير ليمون ... ما تقومي تعملي ليها العصير ...) طوالي سمعت كلامي وقامت تعمل العصير لي حبوبتا.... مع انو والله ما قالت كدا ....

·     قلت ليها والله يا حبوبة جيل مروة دا اسأليني منو أنا .. قاعدين يبقوا لي ...من تستهتروا بحاجاتم ياداب بتركب ليهم في راسم .. بعدين مكياج مروة دا حاجة خفيفة (انتي براك شايفاه ).. بتقولوا علي حاجاتم مسخرة وكلام زى دا عشان كدا ما بقتنعوا بكلامكم ...وانتي قبيل براك قلتي (انسرقتي) من بيتكم ومشيتي اتشلختي زي البنات القدرك ... هسه مروة عادي ممكن تشيل ألوانا ديل في الشنطة وتمشي تعمل( ميك اب )برا البيت وانتو ما جايبين خبر ... وختينا ليها عصير الليمون المثلج وبقينا مارقين

·     وهسه شربنا الشاي

·     لو الشلوخ والمكياج نزلوا الانتخابات الناس اكتر حا تصوت لي منو ؟... أنا عن نفسي برشح الايسكريم

·     و.........

لا .... ما بظن

لدواعٍ في بالي